Maxfiylik siyosati
Ushbu siyosat Gap! ilovasi va mygap.uz sayti (keyingi o‘rinlarda — «Gap!») foydalanuvchilarning shaxsiy ma’lumotlarini qanday yig‘ishi, ishlatishi va himoya qilishini tushuntiradi. Gap! O‘zbekiston Respublikasining «Shaxsga doir ma’lumotlar to‘g‘risida»gi Qonuniga (O‘RQ-547) muvofiq ishlaydi.
1. Ma’lumotlar operatori
«Sabnur Invest» MChJ (Sabnur Invest LLC), STIR 302768664, manzil: Toshkent shahri, Mirobod tumani, Amir Temur shoh ko‘chasi, 32-uy. Murojaat uchun: +998 78 150 55 33, sabnurholding@mail.ru, Telegram: @mygapuz_bot.
2. Qanday ma’lumotlarni yig‘amiz
- Telefon raqami — hisobga kirish uchun.
- Ism — gap a’zolari sizni tanishi uchun.
- Gap ma’lumotlari — siz ochgan yoki qo‘shilgan gaplar nomi, badal summasi, jadval, navbat tartibi, «To‘ladim» belgilari va tasdiqlar, ularning vaqti.
- Karta raqami — agar Profil → Kartam bo‘limida kiritsangiz: navbatingizda pul qabul qilinadigan karta raqami (faqat raqam; amal qilish muddati, CVV yoki SMS kodlar so‘ralmaydi), hamda badalni qanday to‘laganingiz (naqd yoki to‘lov ilovasi nomi).
- Taklif ma’lumotlari — gapga kimning shaxsiy havolasi orqali qo‘shilganingiz.
- Xabarlar — navbat egasi va kechikkan a’zoni taklif qilgan shaxs o‘rtasidagi ilova ichidagi yozishmalar.
- Telegram ma’lumotlari — botni ulasangiz: Telegram chat identifikatori va foydalanuvchi nomi.
- Texnik ma’lumotlar — IP manzil va so‘rov vaqti; ular xavfsizlik, suiiste’molga qarshi cheklovlar va nosozliklarni aniqlash uchun ishlatiladi.
Yig‘ilmaydi: bank karta ma’lumotlari, pasport ma’lumotlari, kontaktlar ro‘yxati, joylashuv. Android ilovasi faqat siz ruxsat bergan bitta kirish kodi SMS’ini o‘qiydi (Google SMS User Consent); boshqa SMS’laringiz o‘qilmaydi.
3. Nima uchun ishlatamiz
- Hisobingizga xavfsiz kirish (SMS orqali bir martalik kod).
- Gaplarni yuritish: a’zolar, navbat, kim to‘lagani va tasdiqlar.
- To‘lov kunlari eslatma yuborish (ilova ichida va, ulasangiz, Telegram’da).
- Firibgarlik va suiiste’molning oldini olish.
4. Kimlar ko‘radi
- Siz qatnashayotgan gap a’zolari — ismingiz, navbatingiz va shu gapdagi to‘lov holatingiz. Telefon raqamingiz boshqa a’zolarga ko‘rsatilmaydi.
- Ishonch tarixi — barcha gaplardagi to‘lov intizomingiz statistikasi (tasdiqlangan va o‘z vaqtida to‘langan badallar soni, hozirgi kechikishlar, yakunlangan gaplar soni) siz bilan bir gapda qatnashayotgan a’zolarga, tashkilotchi bo‘lsangiz esa taklifingizni ochgan shaxslarga ko‘rsatiladi. Boshqa gaplarning nomi, summalari va a’zolari ko‘rsatilmaydi. Raqamingiz qayta ro‘yxatdan o‘tsa, tarix saqlanadi.
- Karta raqamingiz — faqat sizga shu navbatda badal to‘lashi kerak bo‘lgan a’zolarga, to‘lov qilish uchun ko‘rsatiladi. Gap! bu karta orqali pul yechmaydi va o‘tkazmaydi; o‘tkazmani a’zo o‘zi tanlagan to‘lov ilovasida (Payme, Click, Paynet, Uzum Bank) amalga oshiradi.
- Kim taklif qilgani — faqat siz badalni kechiktirsangiz va faqat shu navbatda pul olishi kerak bo‘lgan a’zoga ko‘rsatiladi; u sizni taklif qilgan shaxsga ilova ichida yozishi mumkin. Bu yozishmalarni faqat ikki tomon ko‘radi, ular o‘zgartirilmaydi va gap yozuvlari bilan birga saqlanadi.
- SMS provayderi (Eskiz, eskiz.uz) — kirish kodini yuborish uchun telefon raqamingiz va SMS matni.
- Telegram — faqat botni o‘zingiz ulasangiz, eslatma matnlari.
- Qonunda belgilangan hollarda vakolatli davlat organlari.
Ma’lumotlaringizni sotmaymiz va reklama uchun uchinchi shaxslarga bermaymiz.
5. Saqlash joyi va muddati
Ma’lumotlar O‘zbekiston Respublikasi hududidagi serverlarda saqlanadi va hisob faol bo‘lgan davrda saqlanadi. Kirish kodlari 5 daqiqadan so‘ng yaroqsiz bo‘ladi va faqat shifrlangan (hash) ko‘rinishda saqlanadi.
Hisobni o‘chirish. Hisobingizni ilovada (Profil → Hisobni o‘chirish) o‘chirishingiz mumkin. Faol gapingiz bo‘lsa, o‘chirish gap yakunlanguncha kechiktiriladi: bu ma’lumotlar gap a’zolari oldidagi majburiyatlarni bajarish va mumkin bo‘lgan nizolarni hal qilish uchun zarur (Foydalanish shartlari, 4-bo‘lim). O‘chirilganda ismingiz «O‘chirilgan a’zo» bilan almashtiriladi, telefon raqamingiz o‘chiriladi, faqat uning qaytarib bo‘lmaydigan kriptografik izi saqlanadi — shu raqam qayta ro‘yxatdan o‘tsa, to‘lov tarixi bog‘lanishi uchun. Gap yozuvlari (navbat, to‘lov belgilari va tasdiqlar) boshqa a’zolarning hisobi to‘g‘ri bo‘lishi uchun o‘zgartirilmaydi.
6. Himoya
Ulanishlar HTTPS orqali shifrlanadi, kirish kodlari va sessiya tokenlari ochiq ko‘rinishda saqlanmaydi, ma’lumotlar bazasiga faqat vakolatli xodimlar kira oladi.
7. Sizning huquqlaringiz
Siz ma’lumotlaringiz haqida ma’lumot olish, ularni tuzatish, Telegram ulanishini istalgan vaqtda uzish (Profil → Telegram eslatmalari) va hisobingizni o‘chirish (5-bo‘limdagi tartibda) huquqiga egasiz. Buning uchun 1-bo‘limdagi manzilga murojaat qiling; so‘rovlar 10 ish kuni ichida ko‘rib chiqiladi.
8. Pul haqida
Gap! pul o‘tkazmaydi va saqlamaydi. Badallar a’zolar o‘rtasida to‘g‘ridan-to‘g‘ri, siz tanlagan usulda (naqd yoki to‘lov ilovasi orqali P2P o‘tkazma) o‘tadi. Gap! faqat pul qabul qilinadigan karta raqamini saqlaydi; karta muddati, CVV, PIN yoki SMS kodlarni hech qachon so‘ramaydi.
9. Yosh chegarasi
Gap! 18 yoshga to‘lgan shaxslar uchun mo‘ljallangan.
10. O‘zgarishlar
Siyosat o‘zgarsa, yangi tahriri shu sahifada sana bilan e’lon qilinadi; muhim o‘zgarishlar haqida ilovada xabar beramiz.